Serikali ya China yaishukuru Tanzania kwa ushirikiano

Na: Kitengo cha Habari

WHVUM

Dar es Salaam

Waziri wa Habari, Vijana, Utamaduni na Michezo, Dkt. Emmanuel Nchimbi amesema kuwa Tanzania inafurahia uhusiano uliopo kati yake na China hususan katika tasnia ya Utamaduni.

Waziri Nchimbi ameyasema hayo jana jijini Dar es salaam wakati akiongea na kikundi cha sanaa cha Tianjin kilichotoka nchini China kushirikiana na jamii ya kichina inayoishi nchini kusherehekea mwaka mpya wa Kichina ujulikanao kama ‘Spring Festival.’

Aidha, Kikundi hicho kilichoambatana na Balozi wa China, Bw. Liu Xsheng kimeishukuru Serikali ya Tanzania kwa ujumla kwa ushirikiano ambao imekuwa ikitoa katika masuala mbalimbali ya Utamaduni na maendeleo ya nchi hizo mbili.

“Tunaishukuru Serikali ya Tanzania kwa ushirikiano ambao imekuwa ikitoa katika masuala mbalimbali ya utamaduni na maendeleo baina ya nchi hizi mbili”.Alisema Balozi Liu Xsheng ambae aliongozana na kikundi hicho.

Ugeni huo umetumia nafasi hiyo kumkaribisha Dkt. Nchimbi kushiriki Tamasha la Utamaduni la Afrika (African cultural forum) litakalofanyika nchini China Mei mwaka huu.

Kikundi hicho kilimtembelea leo Waziri wa Habari, Vijana, Utamaduni na Michezo kwa ajili ya kutoa shukurani kwa Wizara kwa ushirikiano iliyoonyesha wakati wa maandalizi ya sherehe hizo.

Mwaka mpya wa Kichina hapa nchini uliadhimishwa tarehe 15 Janauari mwaka huu katika viwanja vya Mnazi mmoja jijini Dar es salaam , ambapo Mgeni rasmi alikuwa Makamu wa Rais, Mhe. Gharib Bilal.