Rais
Jakaya Kikwete amelitaka Jeshi la Polisi nchini kujiandaa kikamilifu
kukabiliana na vurugu zozote zitakazojitokeza wakati wa uandikishaji wa
wapigakura, upigaji Kura ya Maoni kuhusu Katiba Inayopendekezwa pamoja
na Uchaguzi Mkuu utakaofanyika Oktoba, mwaka huu.
Akizungumza
juzi jijini Dar es Salaam wakati wa hafla ya kufunga mafunzo ya maofisa
warakibu wasaidizi iliyofanyika katika Chuo cha Taaluma ya Polisi, Rais
Kikwete alisema dalili zinaonyesha kwamba kuna watu wamejipanga wakiwa
na nia ya kuhatarisha amani wakati wa matukio hayo.
Kwa
tafsiri yoyote ile, kauli hiyo ya Rais Kikwete ni nzito na pengine ndio
sababu wananchi wengi waliotupigia simu jana walionyesha hofu kwamba
kauli hiyo inahitaji ufafanuzi, vinginevyo inaweza kuchukuliwa na Jeshi
la Polisi kama agizo au kisingizio cha kuvunja haki za binadamu kwa
kupambana na wananchi iwapo watapinga au kuhoji ukiukwaji wa sheria,
taratibu na kanuni za uendeshaji wa matukio hayo muhimu kwa mustakabali
wa Taifa letu. Hofu hiyo ya wananchi huenda inatokana na maudhui ya
kauli hiyo ya Rais, ambayo imeonyesha kwamba Rais amejiridhisha kwamba
watu hao ambao hakuwataja wamejipanga kuhatarisha amani wakati matukio
hayo yakiendelea.(P.T)
Hoja ya
wananchi hapa ni kuwa, kwa kuwa matukio hayo kama Uchaguzi Mkuu na
kadhalika ni muhimu sana kwa hali ya baadaye ya nchi yetu, kama kuna
watu ambao kweli wamepanga kuvuruga matukio hayo ni lazima wafichuliwe
na kudhibitiwa mapema kabla hawajafanikiwa kuvuruga matukio hayo.
Hatudhani kama Rais anaweza kutoa tuhuma nzito kama hizo bila serikali
yake kuwa na ushahidi wa kutosha wa kuwapo watu hao, ambao bila shaka ni
hatari kwa usalama wa nchi yetu. Katika hali kama hiyo, wananchi wako
tayari kushirikiana nayo kuhakikisha matukio hayo ya kihistoria
yanafanyika kwa amani na mafanikio makubwa. Hivyo, badala ya Rais
kuliagiza Jeshi la Polisi nchini kujiandaa kikamilifu kwa mapambano
dhidi ya watu hao, tungetarajia watu hao wakamatwe na kufikishwa kwenye
vyombo vya sheria kabla ya kutekeleza njama hizo.
Hicho
ndicho chanzo cha wananchi kuwa na hofu. Kauli hiyo ya Rais inachukuliwa
kama agizo, ambalo uzoefu wetu umetuonyesha kwamba kwa makusudi au kwa
bahati mbaya hutekelezwa na vyombo vya dola na mamlaka nyingine za
kiserikali kinyume na ilivyokusudiwa. Mara nyingi kauli za viongozi
hutekelezwa vibaya kama hazitolewi ufafanuzi wa kutosha. Kwa mfano,
kauli ya Waziri Mkuu, Mizengo Pinda aliyoitoa mwaka jana kwamba wananchi
wasiofuata sheria za nchi 'wapigwe tu' ililichochea Jeshi la Polisi
kuzidisha vitendo vya uonevu dhidi ya raia, ikiwa ni pamoja na uvunjaji
wa haki za binadamu.
Ndio
maana wananchi wanataka ufafanuzi kuhusu kauli hiyo ya Rais Kikwete.
Kwamba itakuwapo vurugu, hivyo polisi wajiandae na Serikali itawapa
vifaa. Wananchi wanaona kauli hiyo imewaacha njia panda na wanahofia
polisi itawaelekezea kipigo, kwani wanatambua kwamba amri ya amiri jeshi
mkuu ni amri halali kisheria na kikatiba. Ni amri inayotaka utii wa
utekelezaji. Ni amri inayohitaji ufafanuzi, kwani ikitolewa katika nchi
kama Tanzania ambayo imekuwa ikiongozwa kwa mujibu wa sheria na Katiba
inaweza kutafsiriwa kwamba Jeshi la Polisi halitakuwa na jukumu tena la
kulinda haki na usalama wa raia. Kinachotakiwa katika kauli hii ya Rais
ni ufafanuzi zaidi.
Chanzo:Mwananchi
Comments