Shirikisho la vyama vya Wafanyakazi nchini (TUCTA) limemtaka Mkurugenzi wa
Kituo cha Sheria na Haki za Binadamu (LHRC), Anna Henga kufuta kauli yake
kuwa kituo hicho kimebaini vyama vya wafanyakazi havina msaada na kwamba
wafanyakazi hufanya kazi kwa muda wa ziada bila malipo pamoja na kufanya
bila mikataba ya ajira.
Aidha, TUCTA limesema taarifa hiyo ni upotoshaji na wanaipinga na kwamba
haina chembe ya ukweli kwani inapingana na takwimu zilizopo kwenye ripoti
husika.
Hatua hiyo imekuja hivi karibuni baada ya mkurugenzi huyo kusikiaka
akitoa kauli wakati akihojiwa na BBC News akieleza taarifa hiyo iliyoitwa
ya upotoshaji.
Hayo yamesemwa jijini humo jana na Katibu Mkuu wa shirikisho hilo,Yahaya
Msigwa wakati akitoa tamko la kupinga taarifa iliyotolewa na LHRC
inayoelezea utendaji kazi wa vyama hivyo nchini.
Alisema TUCTA wameisoma ripoti hiyo ya LHRC ya Muhtasari wa Haki za
Binadamu na Biashara ya mwaka 2017 kwa umakini na kubaini maelezo
yaliyotolewa yanapingana kabisa na ripoti ya kituo hicho.
Msigwa amebainisha kuwa vyama vya wafanyakazi vinafanya kazi kwa misingi
ya sheria na kwamba Katiba ya Jamhuri ya Muungano ya mwaka 1977 kama
ilivyorekebishwa Ibara ya 18 na 19 wamepewa uhuru wa kutoa maoni na
kujumuika kwa watu wenye masilahi yanayofanana.
Amefafanua kuwa katika ripoti ya LHRC imebainisha kuwa asilimia 74 ya
wafanyakazi waliohojiwa walisema wana mikabata ya ajira,asilimia 95
ya wafanyakazi walibainisha wanafanya kazi kwa muda unaotakiwa kisheria,
asilimia 73 wakibainisha mazingira ya kazi ni ya wastani, mazuri na
mazuri sana.
Ripoti hiyo imebainisha kuwa asilimia 55 wamepata mafunzo ya afya na usalama
kazini,asilimia 45 walikiri kuwa fidia hutolewa kwa wafanyakazi wanaoumia
kazini huku asilimia 66 ya wafanyakazi walikiri kuwa na matawi ya vyma hivyo
huku ripoti hiyo ikiongeza asilimia 90 waliohojiwa walisema wwanakwenda
likizo kwa muda na kwamba asilimia 75 ya wafanykazi waliotembelewa walisema
wana utaratibu wa ndani wa kushuhulikia matatizo yao.
Amefafanua kuwa kwenye taarifa hiyo ukurasa wa 13 kuhuusu uelewa wa sheria
za kazi,haki na wajibu wa wafanyakazi LHRC walikiri wafanyakazi wana uelewa
wa elimu ya juu ya umuhimu wa vyama hivyo.
Ameongeza kuwa vyama hivyo vinatimiza majukumu yake ipasavyo kwa kuwatetea
wafanyakazi na kusimamia madai yao.
Kwa upande wake Mwansheria wa TUCTA,Noel Nchimbi amesema matamshi yaliyotolewa
hayaendani na ukweli ulioko kwenye ripoti ya kituo hicho hivyo kinapaswa kufuta
matamshi hayo.
Naye Katibu Mkuu wa Tewuta,Junus Ndalo amesisitiza kuwa kituo hicho kimepotea
taarifa ya upotoshaji inavyovishushia hadhi vyama vya wafanyakazi.
Comments